Ваҳдати миллӣ – кафили субот ва адолати судӣ

Муаллиф: Нурализода Сафар Маҷид
Раиси суди ноҳияи Ҷайҳуни вилояти Хатлон

     Ваҳдати миллӣ барои миллати тоҷик арзиши муқаддасест, ки бо хиради сиёсӣ,
ҷонбозиҳои фарзандони содиқи миллат ва иродаи устувори мардум ба даст
омада, ҳамчун пояи сулҳу субот ва пешрафти устувори ҷомеа хизмат мекунад.
    Дар шароити муосири давлатдорӣ ва ҳифзи манфиатҳои миллӣ, ин дастоварди
таърихӣ рамзи саодати миллат ва кафили адолати судӣ мебошад.
    Пас аз хатми ҷанги шаҳрвандии солҳои 90-уми асри гузашта, мардуми тоҷик бо
пуштибонӣ аз сиёсати созанда ва ваҳдатофари Асосгузори сулҳу ваҳдати миллӣ –
Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон
роҳи сулҳро пеш гирифтанд. Имзои Созишномаи умумии истиқрори сулҳ ва
ризоияти миллӣ 27-уми июни соли 1997, барои миллати мо оғози марҳилаи нави
таърихӣ гардид — марҳилаи барқарории пояҳои давлатдорӣ, волоияти қонун ва
таҳкими институтҳои демократӣ.
     Дар ин замина, нақши мақомоти судӣ, хоса судҳои шаҳру ноҳияҳо, барои ҳимояи
сулҳу субот ва таҳкими ваҳдати миллӣ калидӣ мебошад. Суди мустақилу одилона
танҳо дар муҳити осоиштаи сиёсӣ ва ҳамдигарфаҳмии ҷомеа метавонад
фаъолият кунад. Танҳо дар фазои ваҳдат эътимоди шаҳрвандон ба адолати судӣ,
доступи баробар ба ҳифзи ҳуқуқ, ва амалисозии муътадили қонунҳо таъмин
мешавад.
    Судяҳо ва кормандони мақомоти судӣ вазифадоранд, ки дар баробари татбиқи
қонун, инчунин дастовардҳои ваҳдатро ҳифз намоянд ва бо одоби хизматӣ,
рафтори намунавӣ ва қарорҳои одилона саҳми худро дар таҳкими устувории
сиёсиву ҳуқуқии давлат гузоранд.
    Танҳо дар заминаи ваҳдат мо тавонистем:
— заминаҳои ҳуқуқии демократиро рушд диҳем;
— низоми судиро навсозӣ кунем;
— ба сатҳи нави хидматрасонии ҳуқуқӣ барои шаҳрвандон гузарем;
— ва ба ҷомеаи ҳуқуқбунёд бо қадамҳои устувор наздик шавем.
     Имрӯз, вақте ки Тоҷикистон дар зери парчами истиқлол ва бо такя ба ваҳдати
миллӣ ба сӯи марҳилаи нави рушди миллӣ ворид мешавад, моро зарур аст, ки бо
ҳушёрии сиёсӣ ва масъулияти шаҳрвандӣ ин дастоварди таърихиро чун
гавҳараки чашм ҳифз намоем.
    Ваҳдати миллӣ барои мақомоти судӣ на танҳо муҳити корӣ, балки асоси маънавии
иҷрои адолат аст. Зеро бе сулҳ — қонун амал намекунад, бе оромӣ — адолат ҷорӣ
намешавад, ва бе ҳамдигарфаҳмӣ — ҷомеа наметавонад рушд кунад.
Мо, кормандони мақомоти судӣ, бо дарки амиқи масъулияти худ изҳор медорем,
ки ҳар рӯзи сулҳу ваҳдатро бо адолати амалии судӣ устувор хоҳем кард ва дар
роҳи татбиқи принсипҳои конститутсионӣ содиқона хизмат хоҳем намуд.
                    Зинда бод ваҳдати миллӣ!
                    Зинда бод Тоҷикистони соҳибистиқлол!